Rinne Coláiste Mhuire gan Smál (MIC) ceiliúradh ar éachtaí 94 mac léinn an tseachtain seo ag seachtú Searmanas Bronnta bliantúil an Choláiste, a tionóladh in Lime Tree Theatre ar champas Luimnigh. Thug an ócáid le chéile iad siúd a bhuaigh duaiseanna ó gach cearn de champais MIC i Luimneach agus i nDurlas, agus tugadh aitheantas do réimse suntasach éachtaí acadúla, spóirt, taighde agus cultúir. Bronnadh réimse leathan scoláireachtaí, sparánachtaí agus duaiseanna i rith an tráthnóna, lena n-áirítear níos mó ná €104,000 i scoláireachtaí iontrála. Le linn an cheiliúrtha, tugadh onóir d'fhaighteoirí céaduaire agus dóibh siúd a leanann orthu ag baint barr feabhais amach ina gcuid éachtaí acadúla agus seach-churaclaim.
Thug an tOllamh Dermot Nestor, Uachtarán MIC, ómós do bhuaiteoirí na ngradam agus na scoláireachtaí i mbliana, agus luaigh sé go léiríonn a gcuid éachtaí tiomantas pearsanta agus pearsantacht phobal an Choláiste:
"Baineann an oíche anocht le níos mó ná gradaim. Baineann sé leis an bpaisean a thugann na mic léinn agus na céimithe isteach ina réimsí roghnaithe, an dianseasmhacht a iompraíonn iad trí dheacrachtaí an tsaoil agus an creideamh gur féidir leis an bhfoghlaim saol daoine a athrú, lena n-áirítear a saol féin. Léiríonn gach ainm a glaodh anocht turas lán le hiarracht, tallann agus tacaíocht, agus táimid an-bhródúil as an méid a chuir siad le MIC. Tá saol iontach i ndán dóibh cheana féin, agus is pribhléid dúinn go léir a bheith mar chuid den turas sin."
I measc na scoláireachtaí a bronnadh ar an oíche bhí Scoláireacht Iontrála Cuimhneacháin Ashling Murphy, a bronnadh i mbliana ar an bpíobaire uilleann cumasach Muireann Meade as Co. Thiobraid Árann. Anois sa tríú bliain, tá an scoláireacht á bronnadh i gcomhpháirt ag MIC agus Cumann Múinteoirí Éireann (INTO) agus tugann sí aitheantas do mhic léinn sa chéad bhliain atá ag tabhairt faoi Bhaitsiléir san Oideachas (B Oid) a léirigh buanna eisceachtúla mar sheinnteoirí ceoil thraidisiúnta na hÉireann – na buanna a chuir Ashling Murphy, nach maireann, in iúl go hálainn.
Rinneadh ceiliúradh ar chúigear Scoláirí Scothspórt MIC ar an oíche freisin: Peileadóir de chuid Chiarraí, Aoife Dillane, a fuair an duais don dara bliain as a chéile; Iománaí Sinsir de chuid an Chláir, Adam Hogan; Imreoir Wexford FC, Michael McCarthy; Imreoir Camógaíochta de chuid Thiobraid Árann, Lucy Purcell; agus imreoir rugbaí Acadamh na Mumhan, Fionn Carney. Ina theannta sin, bronnadh Scoláireachtaí Chumann na nImreoirí Gaelacha (GPA) MIC, ar fiú €5,000 an ceann iad, ar Pheileadóir de chuid Phort Láirge, Aoife Brazil agus ar Iománaí Sinsir de chuid na Gaillimhe, Eoin Lawless. Is duaiseanna iad sin a bhronntar gach bliain ar bheirt bhall den GPA atá i mbun staidéar iarchéime in MIC. Bronnadh sparánachtaí CLG na Mumhan, ar fiú €750 an ceann iad, ar naonúr mac léinn eile a bhfuil díograis agus rath eisceachtúil léirithe acu i réimse na gCluichí Gaelacha idirmheánacha, clubanna, contae agus réigiúnacha. Ina measc bhí Maeve Millea agus Abbie Mullane (Camógaíocht), Leah McMahon agus Cara Gannon (Peil Ghaelach na mBan); William Dore agus Eoin Craddock (Iománaíocht); Patrick O'Grady agus Darren Keane (Peil Ghaelach na bhFear); Evan Cahill (Iománaíocht & Peil).
Bronnadh Gradam Cuimhneacháin Rachel Kenneally i mbliana ar Béibhinn Nic a'tSíthigh as Ciarraí. Tá an sparánacht á maoiniú gach bliain ag Cumann Pheil na mBan (LGFA) i gcuimhne ar Rachel Kenneally, céimí Baitsiléir san Oideachas agus ball d'fhoireann an Choláiste a bhuaigh Corn Giles in 2012 agus a d'imir peil idirchontae le Tiobraid Árann chomh maith. Bhí teaghlach Rachel Kenneally i láthair ar an oíche.
Bronnadh maoiniú €104,000 ar 52 mac léinn sa chéad bhliain atá ag teacht isteach tríd an scéim Scoláireachtaí Iontrála MIC, ar fiú €2,000 an ceann iad agus a bronnadh ar bhonn na dtorthaí a fuarthas san Ardteistiméireacht. Tá na scoláireachtaí ar fáil i ngach clár fochéime atá ar siúl sa Choláiste faoi láthair.
Bronnadh Scoláireacht West Chester ar Aaron Cooney (Baitsiléir san Oideachas) agus ar Clodagh Moran (Baitsiléir san Oideachas agus sa tSíceolaíocht), tar éis próiseas roghnúcháin an-iomaíoch a d'aithin na céimithe is fearr ón dá chlár. Arna chur i láthair ag Dámh an Oideachais i gcomhpháirtíocht le West Chester University, Pennsylvania, aithnítear agus ceiliúrtar éacht acadúil den scoth tríd an scoláireacht agus soláthraítear tacaíocht luachmhar de réir mar a bhogann faighteoirí ar aghaidh lena n-aistear gairmiúil agus oideachais.
Bronnadh Duais Iontaobhas Naomh Bonaventura ar sheachtar mac léinn reatha sa Choláiste. Is duais é sin a bronnadh ar na mic léinn ar na cláir Baitsiléir Ealaíon (MIC Luimnigh) agus Baitsiléir Ealaíon san Oideachas (MIC Dhurlais) ar bronnadh an chéad áit orthu sa Diagacht agus sa Léann Reiligiúnach.
Chomh maith leis sin, thug MIC aitheantas do roinnt scoláirí iarchéime den scoth a leanfaidh lena gcuid taighde agus staidéir sa Choláiste. Bronnadh Scoláireacht Dochtúireachta agus Gradam Iarchéime Tíreolaíochta ar Zahid Jahangir mar aitheantas ar a dhul chun cinn trína chlár PhD. Bronnadh Gradam Dochtúireachta MIC ar Peter Linkens, agus bronnadh Scoláireacht Iarchéime ar Oladimeji Sofoluwe chun tacú lena chuid oibre a chur chun cinn.
Tugadh aitheantas freisin do roinnt taighdeoirí agus mic léinn iarchéime MIC trí scéimeanna maoinithe iomaíocha náisiúnta. Bronnadh Scoláireachtaí Iarchéime mór le rá de chuid Rialtas na hÉireann ar cheathrar scoláirí—Desmond Lartey, Michelle Lehane, Augustus Sobeng agus Katie Hallinan—chun tacú lena dtaighde i réimse disciplíní. Bronnadh Comhaltacht Iardhochtúireachta Rialtas na hÉireann ar an Dr Sujaya Dhanvantari ó Thaighde Éireann, ag tabhairt aitheantais do dhoimhneacht agus do ghealladh a cuid oibre leanúnaí. Ina theannta sin, bronnadh Scoláireacht PhD Theach Solais an EPA ar Aislinn Kelly, dámhachtain a thacaíonn le taighde nuálach a théann i ngleic le dúshláin chomhshaoil agus inbhuanaitheachta. Bronnadh Scoláireacht Iarchéime MIC Dhurlais ar Eleanor Corry.
Rinne an Dr. Rebecca Breen, Stiúrthóir Gníomhach ar Scoil Thaighde agus Iarchéime (OSTI) athbhreithniú ar thábhacht na ndamhachtain iarchéime agus céim dochtúra:
“Tá gach duine dár ndámhachtainí dochtúrtha tar éis tabhairt faoi shaothar a chuireann fíorcheisteanna faoin domhan mórthimpeall orainn, agus is fiú go mór an iarracht sin a aithint. Ní hamháin go dtacaíonn na scoláireachtaí seo le taighdeoirí aonair; tugann siad spás d’fhorbairt smaointe—smaointe a bhfuil an cumas acu beartas a mhúnlú, tuiscint a dhoimhniú, agus i go leor cásanna, saol a athrú. Bím i gcónaí faoi dhraíocht ag an tiomantas a thugann ár dtaighdeoirí dá réimsí, agus ag an bhfoighne chiúin atá taobh thiar de gach céim mhór a mbaineann siad amach.Is léíriú iad faighteoirí na hoíche seo ar an gcaighdeán is airde gur féidir le taighde iarchéime a bhaint amach, agus táimid thar a bheith bródúil gur thugamar tacú dóibh agus iad ag brú a gcuid oibre – agus iad féin – chun cinn.”
Chun tuilleadh eolais a fháil ar réimse scoláireachtaí agus dámhachtainí MIC, féach www.mic.ie/scholarships
